harenc

Harenc, m. pen. Est une espece de poisson de moyenne taille, foisonnant és mers septentrionales, comme en celle de la Gothie, Escosse, Angleterre, de Dieppe et circonvoisines, qui est comme une manne aux povres du pays de France. On estime que ce soit Halec, en Latin, toutesfois rondelet le nomme Harengus. De la nature du poisson il n'en y a que d'une sorte, qui est harenc blanc, mais de l'artifice de l'homme il y en a de deux manieres assavoir harenc blanc et harenc sor ou saur, estant iceluy blanc encores distingué en deux, c'est assavoir en harenc de mar que qui est le plus beau et exquis, et en harenc simplement.

Harenc sor, ou saure, c'est celuy qui est sauri au roussable par feu, et devenu de couleur saure à la fumée. Aucuns le veulent appeler harenc soir pource qu'on l'appelle aussi harenc de la nuict et le rendent en Latin, Harengus nocturnus, Mais le Languedoc qui l'appelle harenc sauret, monstre assez qu'il se doit escrire par au, voyez Saurir, Sor, et Roussable.

Harenc de la nuict, voyez Harenc sor.

Thresor de la langue françoyse. Jean Nicot.